Нийслэлийн удирдах ажилтнуудын ээлжит шуурхай зөвлөгөөн өнөөдөр боллоо. Өмнөх хуралдаанаар хотын даргаас өгсөн 23 үүрэг даалгаврын хэрэгжилт 80.4 хувьтай байгааг албаныхан мэдээлэв. Өнөөдрийн зөвлөгөөнөөр Үндэсний их баяр наадмын бэлтгэл, сургууль, цэцэрлэгийн хүртээмж болон өвөлжилтийн бэлтгэл ажлын явцыг голчлон хэлэлцлээ.

Хүүхдийн ордон-II ба Хот тохижилтын ажлууд

• Хүүхдийн шинжлэх ухаан, технологийн ордон: Хотын захиргааны хуучин барилгыг “Хүүхэд хөгжлийн ордон” болгон тохижуулах ажил эрчимжиж байна. Үүний хүрээнд хамтарсан ажлын хэсэг байгуулагдаж, шаардлагатай төсөв, төлөвлөгөө болон захирамжийн төслийг боловсруулж эхэлжээ.

• Шүлхий өвчний эсрэг хяналт: Нийслэлийн хэмжээнд 290.6 мянган толгой мал, амьтныг вакцинжуулж, гүйцэтгэл 92 хувьд хүрээд байна. Авто тээврийн шалган бүртгэх товчоодод 24 цагаар ажиллах 10 хяналтын пост, маршрутын бус 21 замд хөдөлгөөнт эргүүл үүрэг гүйцэтгэж, халдваргүйжүүлэлт хийж байна.

• Ногоон байгууламж ба тохижилт: Хот тохижилтын аяны хүрээнд нийт 2349 байгууламж (үүнд 646 спорт тоглоомын талбай, 87 бичил цэцэрлэгт хүрээлэн) засаж шинэчилжээ. Мөн зургаадугаар сарын 10-ноос хойш 67 байршилд 12 төрлийн 638,943 ширхэг цэцэг тариад байна.

Түрээсийн байрны саналыг 7 дугаар сарын 24 хүртэл хүлээн авна

Нийслэлийн Боловсролын газрын дарга Б.Амартүвшин хотхоны бага сургууль болон төрөлжсөн ахлах сургууль байгуулах ажлын явцыг танилцууллаа. Төрийн өмчийн 5 цэцэрлэгийн барилгыг ашиглан хоёр ээлжээр 1680 хүүхдийг бага сургуульд хамруулах боломж бүрдэж байгаа аж.

Анхааралд: 2026-2027 оны хичээлийн жилд сургууль, цэцэрлэгийн зориулалтаар түрээслүүлэх байрны саналыг долоодугаар сарын 24-ний өдрийг дуустал 46 хорооны нутаг дэвсгэрт хүлээн авч байна. Түүнчлэн төрөлжсөн ахлах сургуулийг дөрвөн үндсэн чиглэлээр хөгжүүлэхээр төлөвлөжээ.

Хотын дарга Б.Пүрэвдагва ямар үүрэг даалгавар өгөв?

Хурлын төгсгөлд Нийслэлийн Засаг дарга бөгөөд Улаанбаатар хотын Захирагч Б.Пүрэвдагва холбогдох албаныханд дараах үүрэг даалгаврыг өглөө.

1. Хуулийн хэрэгжилтийг хангах: 2026 оны долоодугаар сарын 1-ний өдрөөс эхлэн улс, нийслэлийн хэмжээнд 18 нас хүрээгүй хүүхэд мопед, скүүтер, суррон унахыг хуулиар хориглосон тул үүнийг иргэдэд сурталчлан таниулж, хэрэгжилтийг чанд хангуулах.

2. Төлөвлөлт ба Хөрөнгө оруулалт: “Нийслэлийн хөгжлийн 2027 оны төлөвлөгөөний төсөл”-д тусгах саналаа яаралтай ирүүлэх, хөрөнгө оруулалтын ажлыг бүх шатанд эрчимжүүлж хяналт тавих.

3. Өвөлжилтийн бэлтгэл: Хагас коксон шахмал түлш худалдан авах, нөөц бүрдүүлэх ажлыг эрчимжүүлэх. Өвөлжилтийн бэлтгэл ажлын явцыг газар дээр нь шалгаж, тулгамдсан асуудлыг танилцуулах.

4. Орчны тохижилт: Хүүхдийн шинжлэх ухаан, технологийн ордны үйл ажиллагааг эхлүүлэх бэлтгэлийг хангах, зуны халуун өдрүүдэд нийтийн эзэмшлийн гудамж, талбайг усалж чийгшүүлэх ажлыг тогтмолжуулах.