Техас мужид болсон үерийн гамшгийн улмаас амь үрэгдэгсдийн тоо 104-д хүрсэн талаар албаныхан мэдээллээ. Хамгийн их хохирол амссан Керр мужид одоогийн байдлаар 84 хүн амиа алдсан нь батлагдсан байна. Үүнд 28 хүүхэд, 56 насанд хүрсэн хүн багтаж байна. Мөн зуны зуслангийн 10 хүүхэд, нэг багшийн хамт ор сураггүй болоод байгаа нь олон нийтийн сэтгэлийг ихэд түгшээж байна. Үерийн ус гэнэт хүчээ авч, зуслан байрлаж байсан голын ойролцоох газар нутгийг бүрхсэн гэж албаны эх сурвалжууд мэдээлэв.

Хүүхдүүдийн гэр бүлүүд хүлээлт, айдастай өдрүүдийг өнгөрүүлж байгаа бөгөөд аврах багууд завь, нисдэг тэрэг, усанд шумбагчдыг дайчлан эрлийн ажиллагаа явуулж байна. Харин зарим бүс нутагт зам, гүүрүүд эвдэрсэн, цахилгаан тасарсан учир аврах ажиллагаа хүндрэлтэй байгаа аж.

Алба хаагчид мэдэгдэхдээ:

“Энэ бол зөвхөн байгалийн гамшиг бус, олон айлын хувьд хувийн эмгэнэл болж байна. Алга болсон хүүхдүүдийн эрэлд бид бүхий л нөөц бололцоогоо дайчилж байна” гэжээ.